სისხლით, ან სისხლის კომპონენტებით უკანონო ვაჭრობა – სანზონაში, ექიმ-თერაპევტის სახლიდან დიდი ოდენობით გახრწნილი ხორცის ამოღების საქმეზე, გამოძიება სისხლის სამართლის კოდექსის 135-ე მუხლით დაიწყო.
წინასწარი ინფორმაციით, დიდი რაოდენობით ხორცი ცხოველისაა, თუმცა დასადგენია, რატომ აგროვებდა ექიმი საკუთარ ბინაში ქილებში მოთავსებულ სისხლს და ხორცს.
ამ დროისათვის მედიკოსი კლინიკაში დაბრუნდა და სამსახურეობრივ მოვალეობას ასრულებს. “პირველების” მცდელობის მიუხედავად, ქალმა კითხვებზე პასუხების გაცემა არ ისურვა.
კლინიკის დირექტორი კი ამბობს, რომ გადაწყვეტილებას ექიმის სამსახურში დატოვება-გაშვებასთან დაკავშირებით ექსპერტიზის დასკვნის შემდეგ მიიღებს.
რომ ვთქვა, რომ დიდად მაინტერესებს ვიღაცის ნაჭორავები, არც ეგ მაინტერესებს. რაც იქნება დასკვნა, იმის მიხედვით წავალთ ჩვენც. მართლა ძალიან დიდი სტრესის ქვეშ იყო და უნდა დავაცადოთ. თუ სავარაუდოდ, თუნდაც მაგ მუხლს უყენებენ, სულ მცირე, უნდა დააკავონ. ჩემი პირადი მოსაზრებაა, ოღონდ ეს სუბიექტური, რომ საფრთხე არ შეუქმნან სხვა ადამიანებს, – ამბობს კლინიკის დირექტორი.
“პირველები” მედიკოსის ოჯახის წევრსაც დაუკავსირდა, რომელიც არ გამორიცხავს, რომ საქმეში დანაშაულის ნიშნები იყოს.
ჩემი და გამოიკითხა ჩვეულებრივად. როგორც დაფიქსირდა იქ, დაზიანებული იყო კანალიზაცია ბინაში, დაზიანებული იყო, გაფუჭებული იყო მაცივარი, რამაც გამოიწვია პროდუქტების დაზიანება. ვართ ძალიან მძიმე ფსიქოლოგიურ მდგომარეობაშია რაც შემიძლია გითხრათ. მე ვერაფერს ვერც ვადასტურებ, ვერც გამოვრიცხავ, – ამბობს ქალის ძმა.
შეგახსენებთ, რომ სანზონაში, ექიმის სახლში, პოლიციამ დიდი რაოდენობით გახრწნილი ხორცი აღმოაჩინა. ნაპოვნია ასევე, ქილებში მოთავსებული სითხე და კონტეინერებში შენახული ფეკალიები.
ადგილობრივები ეჭვობენ, რომ საქმე კანიბალიზმს ეხება. მოსახლეობას სუნი 3 თვეა, აწუხებს.