რუსეთი ფინეთს, ნატოში გაწევრიანების შემთხვევაში, „სიურპრიზის მოწყობას“ ჰპირდება. რუსეთის საგარეო საქმეთა სამინისტროს პრესსპიკერს, მარია ზახაროვას არ დაუკონკრეტებია, რას გულისხმობს მუქარის შემცველი განცხადება, თუმცა მან ფინეთს პირდაპირ მიანიშნა, რომ მას ნატოსკენ სწრაფვა ძვირად დაუჯდება.
რას გულისხმობს კრემლის მიერ დაანონსებული „სიურპრიზი“ – რუსეთი ახალი ფრონტის გახსნას აპირებს? – როგორც საერთაშორისო საკითხებში ექსპერტი ნიკა ჩიტაძე „პრაიმტაიმთან“ აცხადებს, რუსეთის მიზანია, როგორმე ხელი შეუშალოს ფინეთისა და შვედეთის ნატოში გაწევრიანების პროცესს. მისი თქმით, რუსეთი, ფინეთის ნატოში გაწევრიანების შემთხვევაში, ნატოს წევრ ქვეყანაში შეჭრას ვერ გაბედავს.
„ეს არის დაშანტაჟება, რომ შესაბამის ზომებს მიიღებენ, თუ ფინეთი და შვედეთი ნატოში გაწევრიანდებიან. ძალიან კარგად ვხედავთ, დღეს სად არის ფინეთი და სად – რუსეთი. ფინეთმა აქეთ მოუმზადა სიურპრიზი რუსეთს. რუსეთი ნატოს წევრ ქვეყანაში შეჭრას ვერ გაბედავს, თუ ეს ქვეყანა ნატოში შევიდა. გარდა ამისა, 1939-1940 წლებში რუსეთს ფინეთთან ომში მწარე გამოცდილება გააჩნია, როდესაც 250 ათასამდე საბჭოთა სამხედრო მოსამსახურე დაიღუპა ან დაიჭრა, იმ დროს სტალინის საბჭოთა კავშირმა ვერ შეძლო ფინეთის ტერიტორიის დაპყრობა და მხოლოდ მცირე ნაწილზე დაამყარა კონტროლი.
ზახაროვამ თავისი სკანდალური განცხადებით ყურადღება მიიქცია. რუსეთს ნამდვილად არ უნდა, რომ სადმე მეორე ფრონტი გაიხსნას. ეს არის ძალის დემონსტრირების დაფიქსირება. რუსეთის მიზანია, რომ შანტაჟი გაუვიდეს და ვინმემ განაცხადოს, რომ რუსეთი და ფინეთი ნატოში არ მიიღონ, რაც კრახით დასრულდება“,- განაცხადა ჩიტაძემ.
ცნობისთვის, რუსეთის საგარეო საქმეთა სამინისტროს პრესსპიკერმა მარია ზახაროვამ გუშინ განაცხადა, რომ რუსეთი ფინეთს ნატოში შესვლის გამო მას “სიურპრიზს” უმზადებს, ინფორმაცია რუსულმა მედიასაშუალებამ RIA-მ გაავრცელა.
“ეს იქნება სიურპრიზი. ეს ჩვენი თავდაცვის დეპარტამენტის გადასაწყვეტია. რა თქმა უნდა, შესაბამისი გადაწყვეტილება იქნება მიღებული ფაქტორების მთელი სპექტრის გათვალისწინებით და იმ სპეციფიკის გათვალისწინებით, თუ როგორ განვითარდება ფინეთის გაწევრიანება ნატოში. გადაწყვეტილება ყოველივე ამის საფუძველზე იქნება მიღებული, მაგრამ პირველ რიგში, რა თქმა უნდა, ეს სამხედროების გადასაწყვეტია”, – განაცხადა ზახაროვამ ბრიფინგზე.
წყარო: პრაიმტაიმი.