უკრაინის საპარლამენტო უმრავლესობის ლიდერი “ქართული ოცნების” მხილებას აანონსებს. დავით არახამია ისევ ამბობს, რომ საქართველოს ხელისუფლება რუსეთს სანქციების გვერდის ავლაში ეხმარება და იმ ქართველი მინისტრების და დეპუტატების საბანკო ანგარიშების გამოქვეყნებაზე საუბრობს, რომლებზეც საეჭვო ფული ბრუნავს.
სკანდალური განცხადება დავით არახამიამ ამერიკის შეერთებულ შტატებში გამგზავრებამდე გაავრცელა.
საქართველოს ხელისუფლება რუსეთს სანქციების გვერდის ავლაში ეხმარება. როდესაც ეს ინფორმაცია ამერიკისთვის გახდა ხელმისაწვდომი, ქართველი ჩინოვნიკებისგან მოვისმინეთ, რომ ეს სიმართლეს არ შეესაბამება, მაგრამ დროთა განმავლობაში სულ უფრო და უფრო ჩნდება ობიექტური ინფორმაცია, რომელიც ადასტურებს ჩემს სიტყვებს. საზღვარგარეთ ტრანზაქციების შესახებ მონაცემები და საქართველოდან ბევრი დეპუტატისა და მინისტრის ანგარიშები მალე უფრო ხელმისაწვდომი გახდება და რა თქმა უნდა, ცნობილი გახდება ივანიშვილის კავშირებზეც, რომელიც ძალიან ღრმად არის ჩართული ტერორიზმის დამფინანსებელი ქვეყნის დასახმარებლად სანქციები გვერდის ავლაში. არ შევარჩენთ არავის ვინც უკრაინელების სიკვდილით ფულს შოულობს, – წერს არახამია ტელეგრამ არხზე.
ოპოზიციაში ფიქრობენ, რომ მსგავსი მძიმე ბრალდებები უსაფუძვლოდ არ კეთდება და არ გამორიცხავენ, რომ “ქართული ოცნების” მაღალჩინოსნებს საეჭვო ანგარიშები ნამდვილად ჰქონდეთ.
ის, რომ ვიღაცას შესაძლოა, ჰქონდეს საეჭვო ანგარიშები და არადეკლარირებული შემოსავალი და ეს შემოსავალი შეიძლება, დაკავშირებული იყოს ასევე საეჭვო წყაროებთან, არის ძალიან მძიმე ბრალდება. ასეთი ბრალდებები უსაფუძვლოდ არ კეთდება. ივანიშვილისგან და „ქართული ოცნებისგან“ ყველაფერია მოსალოდნელი, რადგან ეს არის ხელისუფლება, რომელიც საქართველოს ევროპაში ინტეგრაციის მთავარი დაბრკოლება არის, – ამბობს “ლელოს” წევრი, საბა ბუაძე.
იმაში, რომ საქართველოს ხელისუფლებას შესაძლოა, რუსულ სპეცსამსახურებთან ჰქონდეს კავშირი, ეჭვი არ ეპარება “სტრატეგია აღმაშენებლის” წევრს, პაატა მანჯგალაძეს.
„ქართულ ოცნებაში“, მათ შორის, შესაძლებელია პარლამენტშიც, რომ ადამიანებს კავშირი ექნებათ რუსეთთან და პირდაპირ რუსულ სპეცსამსახურებთან, მე ამაში ეჭვი არ მეპარება. რუსეთი საქართველოში 1780-იანი წლებიდან ამუშავებს თავის დაზვერვას, ღიად ყოველთვის იყვნენ აქ და იქნებიან „ქართული ოცნების“ მაღალჩინოსნებთან დაკავშირებული, – ამბობს მანჯგალაძე.
წყარო tvpirveli.ge